ជើងខ្លាំងបំបែកក្តី | Cherng Khlang Bombek Kdey

លោកគ្រូពេទ្យ បេក បុម (Baek Beom) បានបម្រើការជាគ្រូពេទ្យកោសល្យវិច័យ (កោសល្យវិច័យសាកសព) អស់រយៈពេល ១០ ឆ្នាំមកហើយ។ ថ្វីត្បិតតែលោកមានបុគ្គលិកលក្ខណៈរឹងរូស ឆេវឆាវ និងមិនសូវរាប់រកបើកចិត្តឱ្យមនុស្សជុំវិញខ្លួនក៏ដោយ ប៉ុន្តែលោកមានសមត្ថភាពការងារដ៏ពូកែសាហាវមិនធម្មតាឡើយ។ ថ្ងៃមួយ លោកត្រូវមកចាប់ដៃគូការងារជាមួយនាង អ៊ុន សូល (Eun Sol) ដែលជាព្រះរាជអាជ្ញាថ្មីថ្មោងម្នាក់ មានបេះដូងកក់ក្តៅ និស្ស័យស្រស់ស្រាយ និងមានប្រវត្តិមកពីគ្រួសារអភិជនដ៏មានស្តុកស្តម្ភ។ ទោះបីជាមានចរិតលក្ខណៈ និងរបៀបធ្វើការខុសគ្នាដាច់ស្រឡះយ៉ាងណាក៏ដោយ ក៏គ្រូពេទ្យកោសល្យវិច័យចិត្តត្រជាក់ និងព្រះរាជអាជ្ញាស្រីវ័យក្មេងរូបនេះ បានសហការគ្នាយ៉ាងស្អិតរមួត ដើម្បីវែកមុខរកការពិត និងដោះស្រាយរឿងក្តីឃាតកម្មអាថ៌កំបាំងជាច្រើននៅក្នុងសង្គម។